سینیٹ کی قائمہ کمیٹی برائے خزانہ کے اجلاس میں 5 ہزار روپے کے نوٹ پر پابندی کی تجویز پیش کر دی گئی۔ قائمہ کمیٹی برائے خزانہ کا اجلاس سلیم مانڈوی والا کی زیر صدارت ہوا جس میں ٹیکس قوانین ترمیمی بل 2024 پر غور کیا گیا جبکہ بعض شقوں کی منظوری بھی دی گئی۔
اجلاس میں ٹیکس آڈیٹرز اور ماہرین پر ٹیکس دہندگان کا ڈیٹا خفیہ رکھنے، نان فائلرز پر گاڑیوں، بینک اکاؤنٹس اور شیئرز کی خریداری پر پابندی، نان فائلرز کو جائیداد کی خرید و فروخت پر پابندی اور ہائی رسک افراد کا ڈیٹا بینکوں کے ساتھ شیئر کرنے کی شق کی منظوری دی گئی۔
اجلاس میں چیئرمین ایف بی آر نے کہا کہ ان افراد کو گاڑیاں اور جائیدادیں خریدنے سے پہلے اپنی مالی استعداد کا ثبوت دینا ہو گا جب کہ اپنے گوشواروں میں اپنی آمدنی کے ذرائع بھی بتانا ہوں گے۔
ادھر سینیٹر محسن عزیز نے کہا کہ ایف بی آر اس قانون کے تحت کیش اکانومی کو فروغ دے رہا ہے، انہوں نے تجویز دی کہ 5 ہزار روپے کے نوٹ پر پابندی عائد کی جائے۔ تاہم چیئرمین ایف بی آر نے واضح کیا کہ 90 فیصد لوگ اس بل سے متاثر نہیں ہونگے۔
